Analizë

Këtë qeverisje të mbrapshtë shqiptarët nuk e meritojnë

 Dr. Sulejman ABAZI

U bënë shumë vite që shqiptarët votojnë për pushtetin vendor dhe atë qëndror, dhe jo rrallë konstatohet se në përgjithësi ata ankohen për qeverisjet e tyre që ditën e parë të veprimtarisë së saj. Nuk do ta argumentojmë këtë me idenë makiaveliste, se çdo popull meriton qeverisjen që ka, por do ta shtrijmë mendimin tek faktet që me tërësinë e tyre krijojnë fizionominë e vërtetë të « fenomenit qeverisje », duke denoncuar një të keqe të madhe që po na shtëngon përditë, duke na marrë edhe frymën. Këtë radhë do ta lëmë analizën për politikën, për t’ju referuar realitetit dhe për t’u bindur se këtë qeverisje shqiptarët vërtet nuk e meritojnë.  

1. Në Tiranë. Vendimi për hapjen e kazinosë në qendër të Tiranës, është një tjetër vepër dhe qëndrim antipopullor i qeverisë shqiptare, nën drejtimin arrogant të zotit Nano. Shumë shpejtë duan ta bëjnë Shqipërinë si Amerikën dhe Europën, por pa ligje, pa rregull, pa përfillur opinionin shqiptar, i cili vazhdon të vuajë prapësitë e një qeverisjeje, që pretendon se është përfaqësuese e shtresave të gjera sociale në Shqipëri. Çdo gjë mund të besohet në këtë botë, por që qeveria shqiptare të mbështese nevojat e qytetarëve të saj, kjo mbetet krejt e pabesueshme. Kemi mësuar se edhe Las Vegasi është bërë në mes të shkretetirës së Nevadës, dhe dikush i ka vënë nofkën « qyteti i mëkateve ». Tirana nuk mund të jetë qyteti i mëkateve, po as edhe Puka, ku është kërkuar që të okupohet nga bixhozxhinjtë dhe kumarxhinjtë e pasur shqiptar, që vjedhin paratë dhe kërkojnë që me to të plotësojnë epshet personale dhe të simulojnë krimin në Shqipëri. Pas kumarit do të vijnë edhe prostitucioni, edhe bordellot, sepse kumarxhinjve nuk u shkon kumari dhe pazari pa pasur në krah edhe koketat e tyre, që t’i ndihmojnë në fat, dhe pasi t’i joshin me para t’i dhunojnë si përherë. Pranë tyre do të ulen mashtruesit, hajdutët, matrapazët, që pas humbjeve dhe fitoreve do të ulen që të merren më pas me politikë, të ngarkojnë e të shkakrkojnë viktimat e parave të tyre të pista. Një ministër shqiptar u largua nga posti vetëm pas një incidenti në një nga sallat e lojrave të bixhozit në Tiranë. Mos më thoni se kjo nuk është e vërtetë. Kjo është për shqiptarët por nuk përfundon këtu. Çuditërisht edhe këtë here e fituan tenderin kompanitë e privilegjuara greke. Ata do të investojnë në mes të Tiranës, që « të argëtojnë » shqiptarët me paratë e tyre. Atyre u vjen keq për shqiptarët, prandaj dhe i vrasin në kufi, i rrahin, i ndëshkojnë, i përzënë, sepse « i duan » shumë. Për këtë kanë dhënë prova « qytetarie ». Atyre u shijonë më shumë paratë e shqiptarëve, u ka hedhur perëndia trutë e gomarit që të shijojnë çdo gjë shqiptare, edhe tokën tonë. Këtë e kanë thënë hapur dhe tinëz, dhe këtë e di edhe kryeministri dhe qeveria shqiptare. Kjo është politika e zhvillimit dhe e mbështetjes së biznesit në Shqipëri nga qeveria jonë, ky është zhvillimi ynë dhe rruga e hapur drejtë Europës. Do të shkojmë në Europë edhe me kazino edhe me bordello, edhe me flamur të grisur, edhe një çikë antikombëtarë, edhe me tenderime deputetësh, e me çfarë nuk do të dëshironin tjetër shqiptarët që të shkonin në këtë të shkretë Europë, sikur ajo të jetë në ndonjë planet tjetër. Në Europë, ja edhe një vit, e pastaj shqiptarët do të shkojnë me zotitn Nano president. Pavarësisht se cilat janë motivet e lëvizjes « MJFT », por një gjë dihet, ajo dhe opinioni qytetar kanë kundërshtuar ngritjen e kazinosë në qendër të Tiranës. Kazinoja do t’i bëjë karrshillëk edhe kishës ortodokse, që po ndërtohet ngjitur me Ministrinë tonë të Mbrojtjes. Çuditërisht ajo i ka themelet shumë të thella. A thua se ajo ka dëshirë që t’i lëvizë Tiranës sonë edhe nga poshtë, sepse nga lartë ja ka parë hajrin. Një kishë madhështore dhe një kazino mo(derr)ne në mes të Tiranës. Vetëm këto i mungonin zemrës së atdheut tonë të dashur. Dikush me të drejtë ka thën se, « …Kali i Trojes po futet mu në zemër të Tiranës ». Gabohesh i dashur mik, ky ka(r)l ka kohë që na është futur ne shqiptarëve, dhe këtë e kemi dhuratë nga qeverisja jonë so(zorr)cialiste. 

2. Në Vlorë. Vlora, një nga vendet e rralla të Mesdheut, është bërë pre e furisë dhe arrogancës pushtetare të qeverisë dhe të kryenministrit te saj. Qyteti rrezikon që 24 orë në 24 orë, të « pijë duhan » dhe të kancerohet nga zhvillimi i industrisë moderne të periudhës së zhvillimit të tij modern. Virgjërinë, bukurinë, pozitën e mrekullueshme në pikën e ndarjes së bregedetit ranor dhe shkëmbor, e praruar midis zotit, qiellit dhe tokës, Vlora hap dyert e saj çdo vit, për të pritur miqtë e vizitorët, duke u ofruar mikpritjen shqiptare, zemrën e bardhë, bukurinë dhe mirësinë e saj, gjithçka të mirë shqiptare. Kjo është Vlora, që di ta bëjë edhe politikën, por di të japë edhe traditën më të mirë të kombit tonë. Emra të shumtë, që të lënë mbresë dhe të ngjallin edhe nostalgjinë për historinë tonë, Kuduz Babai, kalaja e Kaninës, Parku madhështor i Llogorasë, porti me zhurmën e tij, plazhet e mrekullueshme të jonianit, 340 ditët me diell në këtë qytet të zotit dhe të perëndisë, të falin një perëndim të mrekullueshëm të diellit midis ishullit të Sazanit dhe gadishullit kryeneç, që e mbron atë nga tallazet detare. Kush ka pasur fatin të sodisë qytetin nga maja e Kuduz Babait apo nga kalaja e Kaninës, menjëgherë mendja mund t’i ketë shkuar në Aleksandri, apo diku në vendet më të mira të botës, duke u krenuar me qytetin tonë. Të gjitha këto nuk ka se si të mos i bëjnë vlonjatët të mendojnë, se qeveria e tyre vërtet « nuk e ka me gjithë mend » që ta prishë imazhin e shkëlqyer të qyteti bregdetar. Dikush ka thënë se « …ky qytet duhet të ruhet vetëm si një qytet turistik ». Jo nuk besojmë, se kur e ka thënë me siguri ka qenë i lajthitur. Dikush tjetër i roitur nga mendtë e kokës ka thënë, se do të vijë një ditë që « …grekët dhe italianët do t’u kenë shumë zili dhe mund të kërkojnë punësim këtu ». Ky besoj do të ketë qënë ndonjë nga ata vizitorët e mrekulluar nga nëna natyrë, dhe ka menduar se Shqipëria vërtët ka një të ardhme të mrekullueshme. Gabohesh i dashur mik, kjo nuk konsiderohet toka e shqiptarëve, por toka e premtuar e lakmitarëve përreth Shqipërisë. Punë e madhe se një popullsi e tërë më shumë se sa votat që Fatosi ka marrë për t’u bërë kryeministër, kërkon pastërtinë e dhuratës së natyrës. Kjo duhet të bëhet një tokë e nëmur dhe e harruar. Dhe Fatosi ka filluar t’i ndëshkojë vlonjatët për shpirtin e tyre rebel, sepse ata po i kërkojnë paratë, ata po e zukasin në prapanicë, për t’i kujtuar se nuk i ka hiç mirë punët me qytetin e sertë.

Por mendimi i ambientalistëve të qytetit kundërshtohet nga disa funksionarë karrikethyer, të cilët i gënjen mendja, se Vlora jo vetëm që do të zgjidhë hallet e saj me rafineritë, por ajo do të pasurojë edhe shtetin e shqiptarëve !! Nuk ka faj çiraku të bëj llogari me gishta, se defterët e nxjerrin defiçit. Atij i duken shumë 60 milion dollarë, dhe merakoset për vlonjatët e mjerë që do të punojnë në këto impiante, pa i përfytyruar ata dhe fëmijët e tyre të verdhë, kollëshumë, asmatikë, pa menduar pemët e vyshkura dhe gjëlbërimi në faliment, pa menduar një çast se do të vijë një ditë që qytetarët e këtij vendi, do të mallkojnë ditën që u dha mundësinë të jetëojnë “të lumtur” në qytetin e tyre bregdetar.

Ka dalë një “dervish” sot në Vlorë, që i është mbushur mendja se mund të jetë më i fortë nga dëshira dhe vullneti i qytetit të sertë, vetëm e vetëm se sot ai na qënka dikush në një karrike. I shkreti nënkryetar, e ka zënë që tani deliri i kënaqësisë, se me TEC-in e Vlorës, ai nuk do të vuajë më për drita dhe jo vetëm kaq, por do të ndihmojë edhe të tjetër në hall. Dikush ka publikuar se “…projekte të tilla, me kaq pasoja për vendin, duhet të vendosen me referendum dhe jo me një firmë të kryeministrit”. A e di vallë këtë Nanua, ja kanë thënë apo edhe këtë radhë si në shumë të tjera atë e kanë keqinformuar?! Ambientalistët vlonjatë i ka zënë halli me pushtetarët e tyre dhe me qeverinë e shqiptarëve. Dikush kërkon të nxjerrë të palarat e qverisë në shesh të mejdanit, duke thëne se, “…i gjithë projekti është mbajtur në fshehtësi të plotë”. Gaboihesh i dashur mik, qeveria shqiptare dhe kryeministri i saj janë më trasparentët në Europë dhe në botë. Dikush e ka quajtur “kërcënim për qytetin”, dikush tjetër “mashtrim të qytetarëve nga qeveria”, e çfarë nuk po thonë tjetër. Vendimi i marrë më 19 shkurt të vitit 2003 do të vijë një ditë që do të quhet dita e zezë e vdekjes së qytetit tonë të bukur. Çudia më e madhe e qeverisë është fluska e ministrit të Kulturës Rinisë dhe Sporteve, kur u tha shqiptarëve dhe vlonjatëve se, “…është miratuar edhe një park turistik me qendër në Orikum”. Me siguri djaloshi ministër ka trasmetuar ndonjë nga ato shakatë me kripë të zotit Nano për të joshur vlonjatët “sherrxhinj e grindavecë”. Nuk është e vërtetë, gënjejnë amerikanët e interesuar për projektin AMBO, kur thonë se “…zona do të ketë pasoja të konsiderueshme në rast se do të kthehet në një park energjitik”. Këta amerikanët nuk janë në rregull, që fusin panikun në qytetin tonë!!

3. Në Korçë. Mësojmë se së fundi në Korçë është inaguruar shkolla fillore “Omonia” dhe dega kompjuterike e fakultetit në gjuhën greke. Edhe këtë Korça dhe Shqipëria e kishin mangut. Minoritarët grekë në Korçë do të kërkojnë shkollën dhe gjuhën e tyre, dhe nuk është çudi që ndonjë ditë do të na kërkojnë të krijojnë ndonjë “shoqatë studentore” minoritare edhe në Universitetin e Tiranës, për të kërkuar në të ushtrimin e gjuhës greke. Shkolla fillore greke në Korçë, padyshim që do t’i japë frytet e saj pas 20-30 vjetësh. Ëndërra “e herëshme” greke ka filluar të lulëzojë dhe Korça e traditës së kulturës shqiptare ka nevojë për “pak më shumë helenizëm”. Nuk ka faj as kryepeshkopi Janullatos e as të tjerët që bëjnë zhurmën për të drejtat e mohuara të minoritarëve në Shqipëri. Ka më se 15 vite që qeveritë në Shqipëri i kanë ushqyer orekset greke, duke dhunuar dinjitetin dhe identitetin tonë kombëtar.

Në morinë e ngjarjeve që nuk mungojnë në Shqipëri lexuesi është në gjendje të dallojë atë që i mungon, atë që i dhunohet, atë që i mohoet nga qeverisja e tij. Shqiptarët e stresuar nga politika nuk e meritojnë këtë qeverisje.